Претставено творештвото на македонскиот поет Раде Силјан

СЕ ОДРЖА 24-ТАТА ПОЕТСКА НОЌ ВО ВЕЛЕСТОВО

(Преземено од Дневник)


На 17-ти август, во Велестово се одржа 24-тата Поетска ноќ во Велестово.

Пред многубројната публика во ова планинско село беше претставен портретот на македонскиот поет Раде Силјан. Неговото творештво го претстави проф. д-р Димитар Пандев, кој ги истакна вредностите на неговата поетика, потенцирајќи го патриотскиот однос, како редок мотив во поновото македонско творештво.

Во своето обраќање, Раде Силјан го истакна значењето на оваа манифестација, која во изминатите 24 години се наметна со својата оригиналност и стана една од најзначајните поетски манифестации во Р. Македонија. Тој истакна дека на некој начин го следел и нејзиниот развој, бидејќи бил присутен на поголем број нејзини изданија.

Програмата ја збогати интернационалниот џез музичар Владимир Четкар, кој публиката ја воодушеви со премиерната џез изведбата на охридската староградска песна „Ој Зарино, прва севдо“.

Вториот дел од оваа вечер помина во знакот на изложбата на академскиот сликар Васко Ташковски, кој пред публиката се претстави со 20 акварели. Пригодна реч за творештвото на Ташковски одржа охридскиот сликар Славко Упевче.

Втората вечер, на 18-ти август се одржа интернационалното поетско читање на кое се претставија поетотите Роман Кисјов од Бугарија и Дашамир Мало од Албанија. Вечерта се одржа во лапидариумот на Музејот на Робевци во Охрид. Нивната изведба остави посебен впечаток кај публиката и беа наградени со голем аплауз.

Идната година манифестацијата ќе го прослави својот сребрен јубилеј, 25 години од постоењето.